Alfa - Ein

Taon 1988, ado sekelompok budak-budak yang dimasoke ke kelas yang disebut A1, tepatnyo 2A-1. Taon itu kelas A1 nyo cuman sikok bae. Duo ikok A2 dan tigo ikok kelas A3. Kato uwong kelas A1 ini isinyo budak-budak pinter dan pilihan. Makonyo kato uwong budak-budak A1 tuh high profile. Padahal itu dak bener, kareno ado jugo yang buyan dan lolo di situ. Yo .. cak kamek nih lah. Budak A2 dan A3 tuh banyak yang padek. Kalu dio galak pacak jugo dio masuk A1, tapi budak nih memang dak galak masuk A1, banyak yang sengajo milih A2 atau A3. Contohnyo bae ye pecak Vera, Listina, Gemala (bukan Gembala), Faisal, Yusparman, Ira Padmira, Yuli Isnaini, Beny, Edwin, etc. Banyaklah.

2A1 nih cuman sikok kelas. Mulo-mulo kelasnyo di bawah, parak tanggo, yang kageknyo ditempati oleh 2A2-1. Dem tuh, dipindahke ke loker yang ngadep kantor Kepsek. Caknyo supayo dak pacak ribut. Kelasnyo diselangi sikok kelas dari WC, tempat koyo.

Nah, A1 nih dari kelas 2 sampe kelas 3, budaknyo itu-itu bae. Kecuali si Elimia dan Nurul yang baru masok di kelas tigo. Tapi jugo keilangan Darwison dan Burlian di kelas tigo itu. Waktu kelas tigo, dari 40 budak, cuman 11 uwong yang budak betino. Mereka tuh Anik, Poppy, Elya, Truusye, Elwyn, Eva, Evi, Nurul, Bintang (ehh Kartika), Yuniar, dan Emil. Sisonyo 29 budak lanang galo. Tapi hebatnyo budak tuh dak pernah begoco. Kompak galo.

A1 tuh banyak pentolannyo, pecak Wak Beben (pentolan kelakar), Syafrianur (sikok-sikoknyo Wak Aji), Budi (pragawan), Asril (pemain film Donald), Anom (kolektor), Adi (pentolan sepak bola, walaupun bukan top scorer, kareno top scorer nyo Izman dan Ear Sun – duo layangan wayang kulit), Wak Midi (kalu pelajaran Kimia, dio pindah duduk dari buri ke depan), Lightman (bek tangguh), Abriza (rajo minyak, tapi minyak oles bae), Nando (jagoan event organizer), Zul Kakek (pemikir), Burlian (gelandang serang), Anik yang punyo empat mato (.... sorry, Nik), dan laennyo.

Nah, waktu itu kepalak kelasnyo Wak Midi, yang galak dipanggil Bung Amat. Kelas duo wali kelasnyo Bu Syamsiah. Kelas tigonyo Pak Jamod (Najamuddin). Paleng seru kalu dak katek guru. Oiiii alangke ladasnyo. Ngobrol, nyungkuk-nyungkuk di luar kelas, dan ..... maen gitar. Pernah waktu kelas duo Pak Hasan (Wakepsek) ngendep-ngendep mara'i kelas kareno budak-budaknyo nyanyi maen gitar. Eeiiiitt .. usahanyo Pak Hasan sudah tecium, kareno ado yang nyingok Pak Hasan ngendep-ngendep. Budak-budak diem, ngedem galo. Dio caknyo sakit ati. Masuk kelas, dibabitkenyo absen, belamburan galo. Mulutnyo maki-maki, nyumpah-nyumpah, dan mencarot-carot, sampe ngomong kotor. Oiiii ..dah .... budak-budak tuh A1 musik. Maafke kami Pak Hassan ye ...

Tapi kalu yang masuk Pak Iskandar yang mudo tapi tuo itu, teduduk galo budak-budak dienjoknyo soal matematika. Mamang sikok ini galak nian masukin kelas kosong. Kalu budak lamo nyelesaikennyo, dio nyengir seneng gembira sambil ngejekin. Pernah dio buat gambar pompa dan ditanyonyo dimano letak klep pompanyo. Oiii ... dah.

Sikok lagi yang buat sakit perut nih, Pak Caspar Sinaga, guru matematika. Rasonyo nak diceturke tulah. Mak mano, seluruh soal di buku matematika, disuruhnyo digaweke galo. Oiiii saronyo ... tolong ...

Lemaknyo kalu sudah ari Sabtu. Budak-budak yang kebanyakan dak punyo cewek, janjian jalan-jalan, ato nyungkuk di jalan Kapten Rifai, atau maen nginep di rumah Izman. Padahal pengen rasonyo punyo cewek dan pacak ngapel. Lah, kalu ceweknyo dak galak, mak mano ?

Kalu sudem olahraga, ini yang paling sedep. Ladas ..... Gurunyo bae dak pacak ngendalike budak tuh. Pernah guru nyo ngancam ngoyake absen. Kato budak tuh, koyake lah. Nah, dikoyakenyo nian. Tapi diembeknyo lagi, kareno budak-budak tetep cuek. Budak nih nak maen bola tulah.

Kalu maen bola kaki, kelas dibagi duo tim. Duo baris sebelah kiri kelas melawan duo baris sebelah kanan kelas. Biasonyo yang menang tim sebelah kiri he he . Di tim kiri ado Anom, Lightman, Fikri, Kakek, Sabili, Izman, Earsun, Iwan, Nyak Din, Jun, Reno, Wak Midi, Ermin. Di kanan ado Beben, Nando, Abriza, Adi, Asril, Desfansyah, Parto, Nando. Di sinilah Lightman pacak nakluke Adi.

Mak mano pacak apo kagek reuni tapi sambil maen bola lagi ?